OKWU NKỌWA
Ihe na-eme ka chọọchị dị ndụ na-aga n’ihu, ma ọ bụrụ na e wepụ ọrụ mmụọ nke Kraịst na-arụ, bụ ndị ụka ị na-esonyesi ike n’ihe a na-eme n’ụlọ ụka. Okwukwe abụghị ihe ọnụ nkịtị kama ọ bụ ihe a na-etinye n’ọrụ n’ije ozi. Ezigbo onye ụka bụ onye na-esonyesi ike n’ihe a na-eme, ọ bụghị onye nkiri nọ n’akụkụ eme naanị nkatọ nkatọ. Ebe anyị gụrụ gosipụtara na ọ bụghị naanị na Jizọs na-esonye n’ọgbakọ a na-enwe na Sinagọgụ kama ọ na-esonyesi ike n’ihe a na-eme site n’ịgụ otu ebe n’ Akwụkwọ Nsọ mgbe ọbụla o jere. Mmadụ ịbụ onye ụka na-esonyesi ike n’ihe a na-eme pụtara na mmadụ ga-etinye uchu ma tinye ihe o nwere nke ga-eme ka chọọchị na-aga n’ihu n’ịgbasa oziọma nke na-amịpụta ezi mkpụrụ na ịrụ ọrụ inye aka n’obodo. Ebumnobi ihe ọmụmụ a bụ ka e wee kpalite mmụọ ndị mmadụ ịrụ ọrụ nke isonyesi ike n’ihe a na-eme n’ụlọ ụka.